تعدل عربية جديدة ولا عربية قديمة

تعدل عربية جديدة ولا عربية قديمة ؟!

 

 

النهاردة كنت بتكلم مع واحد صاحبي عن فكرة تعديل عربيةً بي ام دابليو E36 .... طول عمري بفكر في تركيب تربو لعربية من النوعية دي ...وتعديلها بالكامل للوصول الى ٦٠٠ حصان ...٧٠٠ حصان ...اىو حتى ١٠٠٠ حصان ! ناس كتير جوة مصر وبرة مصر وصلوا لنتائج ممتازة ! الموضوع ممكن بس مكلف ... لما كنت بتكلم مع باسل صاحبي عند فكرة تعديل ال “E36 “ ...وهي عربية قديمة موديل ٩٥ ...ثمنها في السوق ميجبش ١٥٠ الف جنيه ...لقيت اني محتاج مش اقل من "٢٠" الف دولار علشان نعمل عربيةً ...يعني ٣٥٠ الف جنيه !!! طيب هل سعر العربية بعد التعديل هيسوى ٥٠٠ الف ؟! الإجابة : لأ طبعا طيب هل re build المحرك مفهوش مخاطرة .. لا طبعا في مخاطرة ...وياما ناس كسرت مواتير مصروف عليها مئال الألوف وهي بيتعملها tune ؟! طيب هل فكرة تعديل عربيةً "قديمة " هي فكرة كويسة اساسا ؟؟؟ احسن من تعديل عربيةً جديدة ؟! من واقع خبرتي ...انا شايف ان تعديل عربيةً جديدة "قوية " هو الحل الأمثل .... مثلا ...عربيةً زي تويوتا سوبرا الجديدة ...اللي بتيجي بموتور تربو من بي ام دابليو ...عربيةً تقدر باقل من ٥٠٠٠ دولار توصلها ل ٥٠٠ حصان ...وممكن اكتر ٢٠ الف دولار يدخلوها في ٧٠٠ حصان عربية زي جولف GTI ...ميني كوبر اس ...ليون كوبرا ...الفا روميو جوليا ....بينطبق عليهم نفس الكلام حتى لو هيطلعوا قوة اقل وفي النهاية راكب عربيةً آمنة و"جديدة" ...وقطعها لم تستهلك وتبوظ وتحتاج صيانة وتغيير ... في العربيات القديمة "العادية " القوة هتحتاج تعمل الاتي ١- تصميم نظام تربو أو شراء كيت كامل ...بنتكلم من ٦٠٠٠ الى ١٠٠٠٠ دولار حسب العربية . ٢- كلاتش كيت محترم مش اقل من ١٠٠٠ دولار. ٣- عفشة وفرامل "٢٠٠٠دولار في المتوسط " ٤- شكمان جديد . ٥- كاوتش جديد وهتعد تجرب ايه اللي هيبقى ماشي مع فكرة تعديليك العربية . ٦- الكرونة والكردان في الأغلب هيتكسروا مع القوة المفرطة الجديدة لان العربية أساسها مش مصمم للكلام ده . ٧- محتاج وقت جبار لوضع الخطة والنزول للصنايعية وطلب القطع وغيره .... لما. كنت بجرب سوبرا الجديدة ...قابلت واحد صاحبي معاه سوبرا الكلاسيكية ....واحدة من أحلام الشباب وواحدة من احسن العربيات للتعديل في التاريخ ... طبعا بعد ماشاء الله ...صاحبي بذل مجهود خرافي ودفع فلوس كتير ....وبردوا العربية مش مظبوطة ...ومش خلصانة...مع العلم انوا عندوا عربيةً ام ٣ سوبر تشارجد جديدة نوعا ما "E92” وماشاء الله بينزل بيها التراك ومبسوط بيها جدا جدا ... الخلاصة .....عربية قديمة ...تعديلها محتاج مصاريف خرافية علشان توصل لقوة تقدر تعتمد عليها وتقدر تعيش ...في مصر مثلا اغلب عربيات الدريفت العنيفة المتعدلة بتخش السباق بتطلع في الاغلب على ونش "مش الكل طبعا " ....فانا رايي ان البدأ من عربيةً جديدة قوية ...هيكون طريق اقصر وأكثر واقعية وده لماً تشتري تعديلات متجربة من شركات كبيرة ...غير كدة ...."ممكن" فلوسك وتعبك يروحوا في غلطة واحدة .... علشان كدة اغلب العربيات المتعدلة السريعة في مصر هي عربيات 340 و m3 و جولف تربو ...اما الحالات الفريدة لعربيات قوية "زي هوندا محمد نبيل الجميلة الله يباركله فيها " هي نماذج "اقل" واتعملت بعد خبرة طويلة وتجارب كتيرة .... انتوا ايه رايكوا ؟! تعديل عربيةً قديمة ولا جديدة احسن ؟!